تناول صانع المحتوى الرياضي راشد في أحدث حلقاته عبر قناته على “يوتيوب” الكواليس والأزمات الأخيرة المحيطة بالمنتخب الوطني قبل ساعات من مواجهته أمام منتخب جنوب السودان في التصفيات المؤهلة لكأس الأمم الأفريقية.
وسلط راشد الضوء على حالة الشحن الإعلامي والجدل المثار عبر منصات التواصل الاجتماعي حول تصريحات المدير الفني حسام حسن، موضحًا أن هناك أطرافًا تستغل الأخطاء لتصفية حسابات شخصية.
وأكد راشد في مستهل تحليله أن تصريحات حسام حسن الأخيرة لم تكن موفقة، إلا أن طريقة التعامل معها تجاوزت النقد الرياضي إلى مرحلة الهجوم الشرس. كما تطرق إلى التحديات الفنية والإدارية التي تواجه المنتخب والأهلي في الفترة الحالية، إلى جانب ملف تجديد عقد الحارس محمد الشناوي وحالة النجم محمد صلاح مع الفراعنة.
وانتقد راشد هجوم منصات التواصل الاجتماعي على حسام حسن بعد أزمته الأخيرة قائلًا: “كابتن حسام حسن غلط في التصريح بتاعه ضد محمد الشناوي وغلط وما حسبهاش قوي لما اتكلم عن محمد صلاح وما حسبش تبعيات الأمور.. لكن اللي بيحصل بقاله يومين على كابتن حسام حسن وخصوصًا في الميديا والسوشيال ميديا كتير.. الموضوع وصل لمرحله تشبه مرحله العجل لما يقع تكتر سكاكينه، في ناس بتخلص حسابات خاصه بها هي في حسام حسن وهو ده عنوان الحلقه لجان افري وير”.
وفسّر صانع المحتوى تصرفات مدرب المنتخب واضطراره لتوضيح موقفه مؤكدًا: “الراجل غلط طبعًا وطلوعه في المؤتمر بيعمل حاجه غصبًا عنه مش مقتنع بيها 100%، فيطلع يقول لك انا كان قصدي إن أنا كنت بتكلم على كان على فعل ماضي.. تصرفه وكلامه عن محمد الشناوي اللي هو غلط أنه يقول كده هي دي شخصيته، كلامه عن صلاح أنه خارج بسبب فني دي شخصيته حتى لو هي صح أو غلط، لكن تبعيات الأمر ما كانتش محسوبه بالنسبه له فلما اتصدم بأرض الواقع الدنيا اختلفت”.
وحذّر راشد من امتداد تأثير الأزمة الحالية إلى لاعبي المنتخب والنادي الأهلي مشيرًا إلى: “الخناقه فيها جزء وشريحه كبيره قوي خاصه بالنادي الأهلي وده اللي راعبني وده اللي مخوفني وده اللي قلقني بجد.. وأوعى تفتكر إن اللعيبة ما بتتفرجش ولا ما بتسمعش تبقى راجل مجنون، حقيقي لعيبة بتتفرج وبتسمع وبتقرأ وعايشين جوه الانترنت.. التصريحات دي لو أثرت وثقة اللعيبة اتتزعزعت في المدرب هيلعبوا على الواقف ودي أخطر حتة”.
وشدّد على التحول المفاجئ في أهمية مواجهة جنوب السودان لتهدئة الأجواء موضحًا: “إحنا عندنا ماتش هو المفروض مش مهم فنيًا، بنلاعب منتخب مع كامل الاحترام الـ 169 فأنا المفروض هيفي سكور.. لكن الماتش مع جنوب السودان بقى مهم جدًا، الطبيعي إننا نكسب سكور وده هيخلي الدنيا تهدي شوية، والشيء بشيء يذكر إحنا اتعادلنا مع أنجولا على أرضنا وقدمنا أداء سيء فالناس مستنيه تشوف رد الفعل”.
ودعم راشد خطوة النادي الأهلي لتجديد عقد محمد الشناوي للحفاظ على عنصر القيادة قائلًا: ‘”أه الشناوي مش في أفضل أحواله قطعًا، لكن أنا مش عايز أفقد كباتن النادي الأهلي.. محمد الشناوي لو هيفضل قاعد بدون أي مشاكل وياخد دوره لما ينزل يجدد لـ 2032 كمان لأن أنا مفتقد وجود الكابتن في النادي الأهلي.. ولما مصطفى شوبير يحس إن المكان اللي وراه شناوي هيفضل قلقان وهيفضل سخن وهيفضل يلعب وهيفضل قوي”.
واختتم راشد حديثه مؤكدًا على ضرورة فرض هيبة الجهاز الفني وعدم المساس بسلطته مع أي لاعب مضيفًا: “محمد صلاح حالة خاصة عشان بس الكلام يبقى مظبوط، ايكونيك فظيع أيقوني تاريخي بس ما ينفعش يتكسر بيه سلطة أو قوة المدرب أي كان صلاح فين وأي كان مين اللي بيدربه.. من حق اللعيب يزعل ويغضب ويقول للمدرب مش عاجبني لكن لما الشكل الطبيعي يتكسر لأي علاقه المنظومه كلها بتنهار”.
