هدير محمد
أثار منشور الفنان تامر حسني جدلًا واسعًا على مواقع التواصل الاجتماعي، بعد حديثه عن التغذية والأطعمة الصحية وما يُفضل تناوله أو تجنبه، إلى جانب دعوته لوزارة الصحة بتوضيح النظام الغذائي الأنسب للأفراد وأساسيات التغذية السليمة، بعد الجدل المتزايد في هذا الصدد.
وتباينت ردود الفعل حول منشوره، إذ اعتبره البعض محاولة للتوعية ونشر الوعي الصحي بين الجمهور، بينما انتقده آخرون معتبرين أن الأمر يحتاج إلى تدخل متخصصين في المجال الطبي.
وكتب تامر، في صفحته الرسمية على موقع التواصل الاجتماعي فيسبوك “في ظل الفتنة الغذائية اللي حاصلة في مصر وحديث كل الناس دلوقتي عن إيه المفيد لينا وإيه المضر، هل ممكن أناشد وزارة الصحة المصرية وكبار الدكاترة المختصين وأصحاب المستشفيات بردود كافية فيها شرح مفصل عن إيه الأكل المفيد لينا وإيه اللي مش مفيد، وياريت يكون شرح مفصل يفهمه الشخص العادي من غير أي مصطلحات طبية أجنبية؟؟؟”.
وتابع “الخضار أمثال الخس والجرجير وورق العنب وكل الورقيات مفيدة ولا لأ، وإزاي نطمن إنها مش مرشوشة مواد تمرض الناس، ثانيًا البيض والفراخ اللي في بلدنا ناكله إزاي وإزاي نميز ونطمن إنه مش محقون، وإزاي نعرفه لو محقون، ثالثًا شرب المياه بكثرة كما تعلمنا مفيد ولا لأ، رابعًا الحليب مضر ولا كويس وإيه الصح اللي نشربه، خامسًا الأدوية لازم تتاخد ولا مش لازم ولا مش أي أدوية تتاخد”.
وأكمل “أناشد وزارتنا المصرية تعمل لنا فيديوهات، حد يطلع يكلمنا بالعامية ويرد بالتفصيل وبالأدلة العلمية على كل ده، وياريت يساعدني صديقي المحترم الأستاذ الفاضل أيمن عباس بما إنه صاحب أكبر المستشفيات، ياريت يطلع لنا دكاترة من عنده مختصين يعملوا فيديوهات ترد على كل اللي حاصل في مجتمعنا، وبناشد برضو الدكتور العظيم مجدي يعقوب والدكتور الكبير حسام موافي ويساعدونا الفترة دي كشعب ويريحونا من الجدل الفظيع ده”.
واختتم “محدش بقى عارف ياكل إيه ومياكلش إيه، وثوابت كتير اتغيرت بين يوم وليلة، أرجوكوا متسيبوناش كده لا إحنا ولا ولادنا، ومحتاجين حد يكلمنا بطريقة بسيطة عامية يشرح فيها بالتفصيل وبالأدلة إيه غلط وإيه صح، وأنا ليه بقول محتاجين أكتر من جهة تتكلم؟ عشان كلنا نطابق الكلام ببعضه مع المنطق ونحكم صح”.
من جانبها، ثمّنت وزارة الصحة والسكان حرص ومبادرة الفنان تامر حسني في التوعية بأهمية العادات الصحية، وهو ما يعكس الدور التنويري لرموز الفن المصري في دعم القضايا الوطنية والمجتمعية، مؤكدة أن “بناء الإنسان المصري” وحمايته من الأمراض غير السارية يُعد على رأس أولويات الدولة.
وفي هذا الصدد، علّق المؤلف والطبيب أحمد عاطف على الجدل الذي أثاره تامر، إذ كتب “هرد على الخمس أسئلة بتوع الفنان تامر حسني اللي طرحهم على صفحته من ساعات وبيطالب فيهم الدكتور مجدي يعقوب، معرفش ليه نزعج الدكتور مجدي يعقوب وهو جراح قلب أصلًا ملوش علاقة بالكلام ده، ولا أنا ليا علاقة أنا كمان بصراحة أنا دكتور عظام بس مقدرش أشوف الفنان تامر حسني مطربي المفضل قلقان جدًا كده”.
وأضاف “الخضار يا أستاذ تامر لو مرشوش مضر ولو مش مرشوش مفيد، كده كده أغسله يعني، وبخصوص البيض والدواجن، هتاكله مقلي أو مسلوق أو مدحرج، والفراخ بانيه أو مشوية أو ستربس، واوعى تاكل الفراخ المسلوقة عشان أنا مبحبهاش، وبالنسبة نعرف محقون ولا لأ أعتقد دي محتاجة حد من وزارة الزراعة مش الدكتور مجدي يعقوب”.
وعن شرب المياه، علق “بصراحة مش فاهم السؤال ده خالص يا أستاذ تامر، أصل مفيش أوبشن، المياه داخلة في كل المشروبات وبتشكل تلتين وزن الإنسان، فلو شاكك فيها وعندك بديل صحي أقوى جرب وقولنا، أما الحليب كويس اشرب، وممكن تضيف موز أو فراولة، بس اسأل حد الأول الموز والفراولة ليهم أضرار ولا لأ لأنهم مش تخصصي، وعن الأدوية بعتلك الرد ع الخاص”.
فيما انتقد الكاتب والطبيب خالد منتصر تصريحات تامر حسني، وكتب منشورًا مطولًا على فيسبوك قائلًا “يا عزيزي تامر، الفنان العزيز، طبعًا أنت مش عايز تقول إنك مقتنع بنظام د. ضياء العوضي فبتطرح حضرتك أسئلة ساذجة وبديهية، وده لأن فضيلة د. ضياء لف لك الطب في سيلوفان ديني، وحضرتك بقى لك فترة بتطلق تصريحات فيها كثير من الدروشة، لا يوجد سؤال أكثر سذاجة من سؤال الأدوية لازم تتاخد ولا لأ، يا سلام على عبقرية السؤال الثوري الرهيب، اللي محتاج د. مجدي يعقوب يذاكر ويرد عليه، ده عامل زي سؤال هل لازم الشمس تطلع؟”.
وأضاف “اللي كان بيقوله د. ضياء يا أخ تامر اسمه في الطب ضلالات، والضلالات لا تناقش، ما تقوليش، ما تناقشه في إن الإنسولين مهم لمرضى أطفال السكر، وإن عدم شرب المياه مفيد للكلى، لأن ده كأنك بتناقش واحد في عنبر الخطرين وعايزني أقنعه إنه مش هو عبد الحليم حافظ، هيقتنع إزاي؟ لو جبت له عبد الحليم نفسه مش هيقتنع”.
واختتم “يا ريت نبطل فتي وهبد، وما نصنعش أصنام من عجوة، وكل فنان عايز يقدم لنا نفسه كداعية يخليه في فنه، ويدع الشأن الطبي لأهله، ويحاول يقرأ ولو كتاب فؤاد زكريا التفكير العلمي، لأن الأسئلة دي لا تليق بفنان مؤثر”.
