هدير محمد
احتفل البلوجر محمد مكاوي مؤخرًا بخطوبته على البلوجر والإعلامية هند مدحت فاروق، في أجواء شهدت تفاعلًا واسعًا عبر مواقع التواصل الاجتماعي، خاصة بعد تداول تعليقات حول علاقة خطيبته الحالية بطليقته السابقة نورهان، باعتبار أن هند كانت صديقة لها.
وأمام حالة الجدل التي صاحبت إعلان الخطوبة، حرص محمد مكاوي على توضيح حقيقة العلاقة، والرد على ما تردد بشأن وجود علاقة بينه وبين هند قبل انتهاء زواجه السابق، مؤكدًا أن انفصاله عن زوجته السابقة تم منذ أكثر من عامين، وأن علاقته بخطيبته الحالية بدأت بعد انتهاء الزواج بفترة طويلة.
وكتب مكاوي في منشور عبر حساباته على مواقع التواصل الاجتماعي “فيسبوك” و”إنستجرام”: “اتنين عملوا حلال ربنا واتخطبوا وهيتجوزوا إن شاء الله، واتنين كانوا متجوزين بالحلال ربنا وانفصلوا بالحلال من أكتر من سنتين، محدش خان حد، ومحدش اتظلم، ومفيش “ضحية” في القصة.
وتابع “زواجي السابق انتهى من أكتر من سنتين، وبعد انتهاء الزواج والانفصال بمدة طويلة، بدأت علاقة جديدة، والنهارده الحمد لله فيه خطوبة تانية للزواج، إن شاء الله، وخطيبتي الحالية صاحبتي من 11 سنة، ومعرفتها عن طريق زوجتي السابقة. إحنا في الأساس كلنا زمايل في نفس مجال الشغل ومعارف من سنين، وده عمره ما كان معناه إن فيه علاقة أو حاجة مستخبية.
وأضاف “طبيعة شغلنا أصلًا فيها سفر وإيفنتات وتصوير وتعامل مع ناس كتير جدًا، فمش معنى إن اتنين سافروا في نفس الشغل، أو حضروا إيفنت مع بعض، أو اتصوروا سوا، إنهم أصحاب مقربين أو إن كان بينهم أي نوع من العلاقات، مفيش علاقات اتدخلت، ومحدش خان حد، ومحدش أخد مكان حد.
واستكمل “مش لازم كل قصة انتهت يبقى فيها ضحية وجاني، ومش لازم بداية جديدة تبقى على حساب حد تاني أو معناها إن فيه حاجة حصلت في الماضي”.
ولم يكتفِ محمد مكاوي بالرد على ما أثير حول علاقته بخطيبته الحالية، بل تحدث أيضًا عن تداول صور قديمة لهند فاروق قبل ارتدائها الحجاب، منتقدًا نشر هذه الصور والتعليق عليها، وقال “في نقطة أهم، ليه إنسانة تختار إنها تلتزم بحدود ربنا وتتحجب، إيه الهدف إننا نرجع نفتش في صورها القديمة قبل الحجاب ونشهرها للناس؟
واستشهد مكاوي بالآية القرآنية “إن الذين يحبون أن تشيع الفاحشة في الذين آمنوا لهم عذاب أليم”، معلقًا “اللي اختار يقرب من ربنا ويتبع أمره، الأولى إننا نعينه ونستره ونحترم اختياره، مش نرجع نطلع له صور من وقت هو اختار إنه يتجاوزه.
واختتم “وفي الآخر، كل واحد فينا عنده حياة وبيت وأهل ومشاعر، والكلمة والصورة اللي بتنتشر ممكن تأذي ناس ملهاش أي ذنب، فاتقوا ربنا في كلامكم، وفي أعراض الناس، وفي اللي بتنشروا بإيديكم، ومش كل بنت بتنتشر جديدة لازم ندور لها على حد تاني نظلمه، واللي بيحبنا وبيتمنى لنا الخير، ادعولنا ربنا يتمملنا على خير، ويبارك لنا في اللي جاي، ويرزقنا راحة البال والسعادة والستر.”
وشدد مكاوي على رغبته في بدء مرحلة جديدة من حياته بعيدًا عن الجدل، مطالبًا متابعيه باحترام خصوصية جميع الأطراف.
