كشف الفنان بدوي فهمي عن تفاصيل الدعم الإنساني والمالي الذي حظي به من زملائه في الوسط الفني خلال أزمته الصحية الأخيرة، مشيدًا بالمواقف النبيلة للنجمين ياسر جلال وماجد المصري.
وفي حوار مع الإعلامية نهال طايل عبر برنامج “تفاصيل” المذاع على شاشة “صدى البلد 2″، روى فهمي تفاصيل فترة علاجه قائلًا: ‘بقالي في المستشفى 17 يوم، والفنان ياسر جلال بيجيلي بالليل عشان مش عايز الناس والصحافة تشوفه”.
وأوضح أن جلال حرص على توفير مستلزمات جراحته رغم تواجده خارج البلاد: “أنا كنت بعمل العملية والمستشفى مفيهاش منظار وياسر جلال كان مسافر برا مصر بعت فلوس وجابلي المنظار عشان أعمل العملية”.
وعبر فهمي عن رضاه التام بقضاء الله قائلًا: “أنا فرحان بالمرض، عشان لما ربنا بيحب حد بيجيب له المرض عشان يشيل عنه الذنوب، أنا عايز أمشي من الدنيا دي وولادي مستورين”.
وأكد أن جلال طمأنه على أسرته ومستقبله المهني قائلًا: “ياسر جلال قالي ولادك وبناتك وعيلتك في عينيا وأنت هتكون كويس وهتشتغل معايا في مسلسل”.
وكان الفنان بدوي فهمي قد أثار تعاطف رواد مواقع التواصل الاجتماعي عقب انتشار مقطع فيديو ظهر فيه باكيًا وهو يستغيث بزميله: ‘أستاذ ياسر، وحياة ابنك وبنتك ما تسبنيش، أنا تعبان وبنام في الجراج، وعندي سرطان ومعنديش دخل، وظروفي صعبة”.
وهي الاستغاثة التي رد عليها ياسر جلال حاسمًا: “وحياة بنتي ما هسيبك وما هنساك، عيب تقول الكلام ده، إنت على راسي يا بدوي، أنا عمري قصرت معاك؟”.
وفي مداخلة هاتفية ضمن البرنامج ذاته، أشاد ياسر جلال بموهبة فهمي قائلًا: ‘الفنان فهمي بدوي أخويا الكبير وهو عمل الصعب، طول عمره مش بياخد أدوار كبيرة، وهو بيعمل دور مهما كان حجمه لكن يسيب بصمة، وراجل الشارع البسيط عارف الفنان فهمي بدوي”.
وأضاف جلال موضحًا تقديره لزميله: “فهو من خلال دور بسيط يعمل بصمة، دي حاجة صعبة جدا أنا بحييه عليها معناه أنه فنان كبير، وأنا واقف جنبك عشان ده واجبي لأنك أخويا الكبير وزميلي، وإحنا كلنا كفنانين مع بعض كلنا في ضهر بعض، أنا مش بعمل حاجة فضلًا ده حقك عليا”.
كما استذكر موقفه النبيل مع أستاذه الراحل قائلًا: “فهمي بدوي كان بيروح مدفن المخرج علي عبدالخالق كان لسه متوفي لقيته بيعيط وكان عايز يجيب علبة بويه ويدهن الباب بتاع المدفن نوع الوفاء لـ أستاذه”.
ولم تتوقف المساندة عند هذا الحد، حيث تطرق بدوي فهمي إلى موقف الفنان ماجد المصري قائلًا: ‘الفنان ماجد المصري يارب يرجع سالم من البلد اللي هو فيها لما سمع إني تعبان في عز تعبه وهو رايح يعمل عملية اتصل بيا”.
وأكمل موضحًا مساندة المصري لأسرته: “بعتلي مصروف لعيالي يكفيهم شهرين، وأنا عندي 4 بنات وولدين فيهم واحد تعبان في الذاكرة”.
