أكدت الفنانة منة فضالي أنها لا تعارض ظهور جيل جديد من الفنانين، لكنها ترفض أن يحصل على فرص الجيل السابق على حسابه، مشيرة إلى أن بداياتها وزملاءها اعتمدت على التدرج في الحصول على الأدوار والفرص الفنية.
وقالت منة خلال لقائها مع الإعلامية إنجي علي في برنامج “أسرار النجوم”، المذاع عبر إذاعة “نجوم إف إم”: “أنا مش ضد إن جيل جديد يطلع، لإن إحنا كنا في يوم من الأيام جيل جديد، بس عمرنا ما كنا الجيل الجديد بياخد مكان الجيل القديم، كنا بناخد فرص خطوة خطوة”.
وأضافت أن الوسط الفني في السابق لم يكن يشهد تدخلات بالقدر الذي تراه حاليًا، موضحة: “وقتها مكانش في محاسيب أوي، مكانش المخرج حد يقول له اعمل كذا أو جيب كذا”.
وشددت منة فضالي على أن اعتراضها لا يتعلق بظهور الوجوه الجديدة، وإنما بغياب الموهبة لدى بعض العاملين في المجال، معلقة: “أنا النهاردة ضد قلة الموهبة، لو حد موهوب وشاطر وشاطرة معنديش اعتراض، لكن أنا ضد يبقى حد مبيعرفش يتكلم أصلا أو مبتعرفش، ليه تفرض عليا حد دمه تقيل مبيعرفش يقول مخارج الألفاظ؟”.
وأكدت منة فضالي توقفها عن متابعة الأعمال الدرامية التليفزيونية قائلة: “أنا موقفة تقريبا أتفرج على مسلسلات لإن في ناس غريبة أوي، ممكن يكونوا ناجحين في حتتهم، لكن مش ناجحين في حتتنا”.
وأضافت “مينفعش أجيب حد بيقول بسم الله ويبقى نجم شباك أو مسلسل، في ظل إن عندك نجوم قاعدة في البيت إنت كنت بتبيع بيها وتشغلها، وكان لها أفلام ومسلسلات كل سنة”.
وأشارت منة فضالي إلى أنها لم تعد تعمل كما في السابق بقولها: “أنا واحدة من الناس كنت بشتغل كتير جدا مبقتش أشتغل، السنة اللي فاتت عملت عمل واحد، في ظل كل المسلسلات الأوف سيزون دي أنا فين؟”.
وكشفت عن تفكيرها في اتخاذ قرار جذري إذا لم تتحسن ظروف عملها، موضحة أنها قررت الهجرة في حال استمرار الأمور بهذا الشكل.
وقالت منة “السنة دي لو الدنيا مظبطتش معايا هبيع كل حاجة وأهاجر مع والدتي وأعمل مشروع برة مصر، مش هتحمل أمشي في الشارع ويسألني الناس أنتي فين؟ أنا لسه صغيرة، أومال لما أكبر هيعملوا فيّ إيه؟”.
